Supostos cursos para os desempregados en Nigrán

Esquerda Unida considera pouco serio o convenio firmado polo alcalde para impartir cursos de formación a 200 desempregados de Nigrán, ademais de que vai a servir para pouco.

Despois do “que se jodan” dito por unha deputada do Partido Popular durante un debate sobre o desemprego, das políticas do Partido Popular que levaron a que no Estado Español e en Nigrán aumentase o desemprego até niveis insostibles, agora o Alcalde de Nigrán asina un convenio para formar a desempregados cun contido totalmente alleo á realidade da maioría das case 2000 persoas desempregadas en Nigrán ou dos máis de 5000 desempregados do Val Miñor.

Segundo o Concello de Nigrán entre as accións ofertadas figuran Intervención na Atención Hixiénico-Alimentaria e Socio-sanitaria en institucións; Desenvolvemento Tecnolóxico de Aplicacións JAVA; Innovación no Proceso de Venta: E-commerce e Community Management e Técnico de Internacionalización, entre outras. Ditos cursos están financiados polo Servizo Público de Emprego Estatal e pola Fundación Tripartita para a Formación no Emprego, teñen un ámbito estatal e non só en Nigrán. De feito algúns destes cursos foron adxudicados a entidades de Zaragoza, de Madrid ou Extremadura, polo que nos estranamos que se vaian a impartir a 200 desempregados de Nigrán tal como afirma o alcalde.

Ditos cursos teñen un proceso de selección dos participantes, no que as persoas desempregadas participantes, menores de 30 anos, deberán estar inscritas como demandantes de emprego nos Servizos Públicos de Emprego e serán propostas polos mesmos, previa solicitude das entidades beneficiarias. Só se ditos Servizos Públicos non propuxeran persoas para participar, a entidade beneficiaria poderá seleccionar outras persoas desempregadas, menores de 30 años, que será realizada pola entidade beneficiaria, atendendo ás prioridades do proxecto, aos itinerarios formativos, ás necesidades identificadas polos Servizos Públicos de Emprego respecto das persoas desempregadas e a criterios de igualdade e de obxectividade. Entre os criterios de selección non figura o pertencer a ningún municipio en particular, e menos Nigrán. Polo que dubidamos da veracidade da afirmación do alcalde de Nigrán, que asegura que as mozas e mozos desempregadas do municipio teñan prioridade no proceso de selección e participación nesta oferta formativa.

Lembramos que dende Esquerda Unida solicitamos que sexa o propio concello o que organice os cursos de formación para desempregados, realizando unha oferta formativa adecuada ás características dos desempregados do Concello e do Val Miñor, tal como solicitamos hai uns días. Non se pode facer un plan de emprego sen antes ter feito un estudio serio da natureza do paro en Nigrán e sen definir cales son os sectores produtivos que se queren reforzar. Como primeira medida para xerar emprego en Nigrán Esquerda Unida propón que ditos cursos sexan impartidos por desempregados para que non se perda diñeiro en empresas privadas. Esquerda Unida esixe que se faga público o convenio asinado entre o alcalde e a empresa formadora dos desempregados de Nigrán, xa que todos os datos nos levan a pensar que non é viable impartir estes cursos a 200 desempregados de Nigrán. Esquerda Unida recomenda aos desempregados que desexen facer estes cursos que se dirixan as oficinas do INEM xa que van a ter prioridade sobre os beneficiarios do convenio asinado polo alcalde, ademais que a dirección de correo electrónico facilitada polo concello para que se dirixan as persoas interesadas nestes cursos non existe, tal e como se queixaron moitos desempregados e verificamos nos mesmos.

A continuación pomos a disposición a documentación á que tivemos acceso sobre estes cursos (na cal non se fai mención a Nigrán… de aí que, repetimos, pedimos ao Alcalde que faga pública o convenio asinado coa empresa formadora).

BOE-A-2012-12938

Criterios de selección

Curso_Community_Management

Curso_Técnico_Internacionalización

 

Advertisement

Esquerda Unida solicita cursos de formación para Nigrán

Esquerda Unida, integrada na Alternativa Galega de Esquerda, lamenta o continuo aumento de persoas desempregadas no Concello de Nigrán, que chegou a 1793 persoas a finais de 2012, un 6,28% máis que fai un ano. Para Esquerda Unida as actuais políticas de recortes que están a levar  a Xunta e o Goberno central non fan máis que máis que agravar este problema.

Esquerda Unida de Nigrán considera que, entre outros, é o modelo produtivo o causante da actual crise,  que se manifesta de maneira tan alarmante nesta alta tasa de desemprego que estamos a sufrir. Neste escenario, a formación dos desempregados é algo imprescindible para ter unha saída ao problema. Dita formación deberá estar encamiñada á capacitación en novos sectores que se afasten da economía baseada na especulación urbanística, sendo este o primeiro paso para a consecución dun novo modelo produtivo.

En Nigrán prometéranse moitos postos de traballo para os veciños e veciñas, no Polígono do Porto do Molle, pero a realidade é que son moi poucos os veciños de Nigrán que son empregados no mesmo. Ademáis, a maioría en postos de traballo de escasa cualificación, quedando os postos “cualificados” en mans de traballadores doutros concellos. Tamén lembramos que no ano 2011 só se celebrou un curso para desempregados por un centro privado e no 2012 non se celebrou ningún curso dentro do Plan AFD, para desempregados.

Por todo elo solicitamos ao Concello de Nigrán que adopte as medidas oportunas para que dende o Concello de Nigrán se celebren cursos de formación para desempregados dentro do plan AFD da Xunta de Galicia, actualmente con convocatoria no DOGA aberta ata o 31 de maio, e que non deixe pasar esta oportunidade de formación para os cidadáns de Nigrán. O noso Concello no debe deixar a formación dos desempregados en mans unicamente da iniciativa privada.

Para Esquerda Unida estes cursos deberían estar dirixidos para acadar un nivel de cualificación en diversas especialidades relacionadas co tecido produtivo da comarca, así como do perfil dos veciños e veciñas demandantes de emprego, e non só de informática que son os que se celebran no Centro Antena ou de fontaneiro, para á que está acreditada a escola obradoiro. ¿É que non temos outras necesidades de formación? Polo tanto tamén solicitamos a acreditación do concello de Nigrán como centro de formación para o emprego en outras especialidades, ampliando deste xeito a oferta formativa aos veciños e veciñas demandantes de emprego en Nigrán.